ARSÉNICO POR COMPAIXÓN

DE JOSEPH KESSELRING. VERSIÓN DE TITO ASOREY

TEATRO MUXICAS

ESTREADA EN XUÑO DE 2016

Arsénico por Compaixón, en versión de Tito Asorey, é unha comedia negra que, tomando como base a obra de Joseph Kesselring (na que se basea o famoso filme protagonizado por Cary Grant), traslada a acción á Galicia da nosa época. Trátase dun vodevil cheo de frescura, dinamismo e inxenio, cunha posta en escena áxil e chea de movemento, na que o público goza de 65 minutos de sorpresas e continuos xiros de guión.

SINOPSE

Lucía, unha moza que traballa de actriz nunha coñecida serie da TVG, visita ás súas anciás tías antes de casar co seu mozo. Durante a visita descobre que as súas amables, tenras e bondadosas familiares teñen un xeito estraño de practicar a caridade. Cando é consciente de que agochan o cadáver dun ancián no frigorífico da súa cociña, dáse de conta dunha terrible realidade: as súas tías dedícanse a solucionar os problemas de soidade dos velliños que van visitalas facendo que pasen a mellor vida mediante un combinado de velenos que lles introducen na bebida. Ante esta realidade, Lucía ten que tomar unha decisión urxente...pero non será sinxelo, porque outro problema enreda aínda máis a trama: a chegada do seu irmán, un criminal desaparecido hai anos, que volve con outro cadáver no maleteiro do seu coche e do que quere desfacerse. Lucía terá que poñer todo o seu empeño en resolver esta delicada situación.